पडळकरांच्या तोंडाला काळे फासून चोप देणार; राष्ट्रवादी आक्रमक

वृत्तसंस्था प्रतिनिधी:- राष्ट्रवादी काँग्रेसचे अध्यक्ष शरद पवार यांच्याविरोधात भाजप आमदार गोपीचंद पडळकर यांनी केलेल्या बेताल वक्तव्याचे राष्ट्रवादीतून जोरदार पडसाद उमटत आहेत. पडळकरांनी पवारांची जाहीर माफी मागावी अन्यथा त्यांच्या तोंडाला काळं फासून चोप देऊ, असा इशारा राष्ट्रवादीने दिला आहे. पडळकरांच्या वादग्रस्त विधानामुळे आक्रमक झालेल्या राष्ट्रवादीने आज ठिकठिकाणी पडळकर यांच्या पोस्टरला जोडे मारत आंदोलन केले.

पंढरपूर येथे पत्रकारांशी संवाद साधताना भाजप नेते गोपीचंद पडळकर यांनी शरद पवार हे महाराष्ट्राला लागलेले करोना आहेत, असं वादग्रस्त वक्तव्य विधान केलं होतं. त्यामुळे राष्ट्रवादी काँग्रेस आक्रमक झाली असून राष्ट्रवादीच्या सर्वच नेत्यांनी पडळकर यांना झापले आहे. वाचाळ वक्तव्य करणं ही भाजपची परंपराच आहे. त्यामुळे ही परंपरा कुठे तरी खंडित केलीच पाहिजे, असं सांगतानाच पडळकरांचं तोंड काळं करून त्यांना चोप देण्यात येईल, असा इशारा राष्ट्रवादी युवक काँग्रेसचे कार्याध्यक्ष नितीन देशमुख यांनी दिला आहे.

आमच्या विरोधात गुन्हा दाखल झाला तरी कोणत्याही कारवाईला सामोरे जाऊ पण पडळकर यांना चोप देऊच असंही देशमुख म्हणाले.

 🔹बालिश वक्तव्य

पडळकर यांचं वक्तव्य निंदणीय तर आहेच, पण बालिशही आहे. पंतप्रधान नरेंद्र मोदी स्वत: ज्यांना आपला आदर्श मानतात त्या नेत्यावर टीका करणं हे बालिशपणाचं लक्षण आहे, अशी टीका करतानाच ज्यांचं लोकसभा आणि विधानसभा निवडणुकीत डिपॉझिट जप्त झालं त्यांनी टीका करावी हे हस्यास्पद आहे, असा टोला राष्ट्रवादीचे नेते अमोल मिटकरी यांनी लगावला. पडळकर यांनी माफी मागावी, अशी मागणीही त्यांनी यावेळी केली.

 🔹पडळकरांनी बहुजनांच्या पाठित खंजीर खूपसला

महाबुध्दिवान... महानिष्ठावान... पक्ष बदलण्याचा अनुभव असलेले गोपीचंद पडळकर हे सडक्या मानसिकतेचा किडा आहे, अशी जोरदार टीका राष्ट्रवादी काँग्रेसचे प्रदेश प्रवक्ते महेश तपासे यांनी केली आहे. बहुजनांच्या पाठीत खंजीर खुपसणारे गोपीचंद पडळकर यांनी शरद पवारांवर टीका करणे योग्य नाही. आधी बहुजन वर्गासाठी काय केले याचं आत्मपरीक्षण पडळकर यांनी करावे, असे आव्हानही तपासे यांनी दिले आहे. सत्तेसाठी धर्मवादी पक्षासोबत गेलात आणि बहुजनांचा विश्वासघात केलात असा थेट आरोपही त्यांनी केला.

 🔹बीडमध्ये जोडे मारो आंदोलन

दरम्यान, पडळकर यांच्या वक्तव्याच्या निषेधार्थ आज बीडमध्ये युवक प्रदेशाध्यक्ष महेबूब शेख यांच्या नेतृत्वाखाली पडळकर यांच्या प्रतिमेला जोडे मारत आणि ती प्रतिमा जाळत बीडच्या शिरूर (कासार) येथे आंदोलन करण्यात आले. यावेळी पडळकरांचा फोटो असलेल्या बॅनरला जोडे मारण्यात आले. या बॅनरवर पडळकरांच्या फोटोखाली 'मी देवेंद्र फडणवीस यांचा मूर्ख गुलाम' असं लिहिलेलं होतं. त्यानंतर हे बॅनर जाळून टाकण्यात आलं.

 🔹ठाण्यात पोस्टर जाळले

ठाण्यातही राष्ट्रवादी काँग्रेसने पडळकर यांचे पोस्टर जाळत निषेध नोंदवला. गृहनिर्माण मंत्री डॉ. जितेंद्र आव्हाड यांच्या मार्गदर्शनाखाली शहराध्यक्ष आनंद परांजपे यांच्या नेतृत्वाखाली राष्ट्रवादीच्या कार्यकर्त्यांनी पडाळकर यांचे छायाचित्र जाळले. यावेळी राष्ट्रवादीच्या कार्यकर्त्यांनी पडाळकर यांच्या छायाचित्राला जोडे मारून ते जाळले. यावेळी पडाळकर यांच्या निषेधार्थ कार्यकर्त्यांनी जोरदार घोषणाबाजी केली.

शरद पवार यांची देशामध्ये जाणता राजा अशी ओळख आहे. बहुजन समाजातून नेतृत्व घडवण्यात त्यांचा मोठा वाटा आहे. दलित, आदिवासी, भटके-विमुक्त समाजातील अनेक कार्यकर्त्यांना घडविण्यात आणि त्यांना संविधानिक पदांवर विराजमान करण्यात; मंत्रीपद देण्यात शरद पवार यांचा सिंहाचा वाटा आहे. त्यामुळे स्वार्थासाठी वारंवार बेडूक उड्या मारणार्‍या पडळकर यांच्यासारख्यांना पवार यांचे महत्व आणि कर्तृत्व समजणारच नाही. आपल्या नेत्यांना खूष करण्यासाठी त्यांनी ही टीका केली आहे. ही टीका राष्ट्रवादीचे कार्यकर्ते सहन करणार नाहीत. त्यांनी या विधानाबाबत तत्काळ माफी मागीतली नाही तर आम्ही पडाळकर यांना काळे फासू तसेच पडाळकर यांना ठाण्यात पाय ठेऊन देणार नाही, असा इशारा आनंद परांजपे यांनी दिला. यावेळी ब्लॉक अध्यक्ष समीर पेंढारे, वॉर्ड अध्यक्ष सुभाष आंग्रे यांच्यासह अनेक कार्यकते उपस्थित होते.